Buernwark

In düsse Tied, in´t Fröhjohr, bestellt de Buern eere Felder und allens ward inseit und plant. Avers nich nur, dat se vör und bie´t Wassen und ok dorno örntlich Gift opsprüht, ne se klaut de Gemeinden, und dormit jedeen Börger, ok noch dat Land!

Se plögen eenfach jedet Johr noch een beeten mehr vun den Ackerrandstriepen wech und mooken so eere Anbuflächen grötter und grötter. In Harvst geiht dat all los. Wenn se no de Ernte allens „winterfest“ mooken. Oder se sprütten so, dat de Wildkrüterstriepen und ok noch een Deel vun denn Feldwegg’n Flaag afkreegen und allens twei geiht.

So is dat öberall und ok bi uns in de Gemarkung to „bewunnern“. Hunderte Meters hebbt se weggplöögt, deelwies sünd se all direktemang an de erste Fohrspur vun den Wegg ankoomen. Und wo blivt de Gemeinde!?

Se sünd vun Gesetz her in de Plicht, dat Gemeingut to wohren! Also, man ran! Und se seggen, de Buer is een verantwortlichen Minschen, de passt op, dat de Ümwelt nich to Schannen kümmt – avers dat süht man oftens anners ut, leeve Lüüd! Öberall Plastikplanen und  Giftkanister, eeren Schiet schmieten se in’t Holt, se sprütten wat dat Tüch höllt und föhren veel to veel Mist und Gülle op de Scholl, wiel se in eere Grootställe ok veel to veele Dierten hebbt.

Dat gröttste Malheur is avers, dat se de Oartenveelfalt tweimooken mit eern Monokulturensprüttanbu. Dor nützt dat ok nix,wenn se dat mit bunte Schilders und in eere Buerngazetten propageert, wo scheun se sik kümmert. Dor is veel hitte Luft bi und de wenigen Buern, de noch Ehre und Geweten hebbt, de goht mit denn Bach rünner.

Bruukst jo nur na West-Neddersassen kieken – Massen an Dierten, Massen an Schiet und se müssen all dat Drinkwater vun so männig een Soot mit „sauberet“ Water mischen, dormit se de Lüüd öberhaupt noch versorgen künnt! Wat mooken se, wenn de lettste Soot ümkippt is?? – Scheune moderne Landwirtschaft!

Avers so lang sik dormit noch veel (Subventions-) Geld verdeenen lött, is bi se allens in Ordnung. Ob se wohl noch mol to Besinnung koomt!? De Hoffnung starvt toletzt… Ik sülm glöv dat jo man nich, dor mütten se erst dat ganze System ümstellen – ok in eere Köppe!

Mach ok ween, dat de Buern dat mit de Ackerrandstriepen nich verstohn hebbt as dat meent is – se plöögen denn Acker bit to’n Rand, dat nur een Striepen (de Fohrwegg) blivt. Und so kriggt de dümmste Buer nich de dicksten, avers de meisten Kantüffeln!

Kiekt jüm de Krüderveelfalt und de veelen bunten Bodderlikker an, solang se dat noch givt!

Let jüm ni argern!
Niels 

Wörterbuch – Wöörbook

wassen – wachsen
sülm – selbst
Soot – Brunnen
Krüder – Kräuter
Bodderlikker – Schmetterling
wassen – wachsen